Rojhelat Tv Live

زانیاری وه‌رگرتنی ته‌له‌فزیۆنی ڕۆژهه‌ڵات له‌ سه‌ر مانگی ده‌ستکردی هۆتبێرد :Hot Bird 6 at 13.0°E ,10815 H, Rojhelat TV , SR 27500-5/6

هه‌واڵه‌کان
بۆچون: 0    بینراوه‌: 4132 جار    ده‌نگ: 1   (Article Rating)            بینێره‌ بۆ چرکه  بینێره‌ بۆ دنباله بینێره‌ بۆ بالاترین بینێره‌ بۆ تویتر بینێره‌ بۆ فه‌یسبوک Bookmark and Share
Sunday, February 15, 2015
پەیامی سكرتێری گشتیی كۆمەڵە لە ڕۆژی كۆمەڵە

دەقی وتەكانی بەرێز" عەبدوڵڵا موهتەدی "سكرتێری گشتی كۆمەڵەی شۆڕشگێڕی زەحمەتكێشانی كوردستانی ئێران سەبارەت بە رۆژی كۆمەڵە "26ی رێبەندان" لە ئوردووگای ناوەندی كۆمەڵە.

میوانە بەرێزەكان، نوێنەرانی حیزب و لایەنە سیاسییە بەرێزەكان، كەسایەتی و مامۆستایانی زانكۆ و پارلمانتارە بەڕێزەكان، دۆستان و دڵسۆزان، هاوڕێیانی پێشمەرگە، هەموو بەشداربووانی خۆشەویستی رێ‌ورەسمی بیست و شەشی رێبەندان، رێبەندانی رێنوێن، رۆژی كۆمەڵە، پڕبەدڵا بەخێرهاتنتان دەكەم و سوپاسی هاتنتان دەكەم.

بەڕێزان، با پێش هەموو شتێك رێز و سپاسی بێ‌پایانی خۆمان پێشكەش بە هەموو ئەو پێشمەرگە و تێكۆشەرانە بكەین كە لە بەرەكانی جەنگ بەدژی هێزی كۆنەپەرست و تێرۆریستی داعشدا ماندویی نەناسانە خەبات دەكەن و هەر لێرەشەوە سەری رێز و خۆشەویستی بو هەموو شەهیدانی ئەو خەباتە لە هەموو بەرەكانی شەڕدا دانەوێنین. كۆمەڵە لە یەكەم كاتەوە بەو پەڕی هەست بە مەسئولیەت كردنەوە و بەهەموو توانای خۆیەوە بۆ هەموو هاوكاری و بەشدارییەك ئامادە بووە و ئەوەشی بە كردەوە نیشان داوە و بەرووسووری ئیسباتی كردوە.

هەروەها با وتاری ئەو رۆژە بە كردنەوەی یادی هاوڕێی رابەر كاك حەمە حوسێنی كەریمی، یەكێك لە دامەزرێنەرانی كۆمەڵە لە پایزی سالی 1348ی هەتاوی رێكەوتی 1969ی زایینی، دەست پێبكەین كە ساڵرۆژی گیانبەخت كردنی ئەو لە سی و شەش ساڵا لەوە پێشەوە بووە بە مادە تاریخی رۆژی كۆمەڵە، رۆژی رێز گرتن لە رێبازی رەوتێك كە مۆركی لەسڕینەوە نەهاتووی پێشكەوتنخوازییەكی رەسەنی لەسەر بزووتنەوەی رزگاریخوازانەی گەلی كورد لە كوردستانی رۆژهەڵات بەجێ‌ هێشتووە. لەم رۆژەدا سەری رێز لە ئاست هەموو شەهیدانی ئەو رێبازە دادەنەوێنین و پیرۆزبایی رۆژی كۆمەڵە و دەستخۆشی لە هەموو هەڵسووراوانی رێكخستنی نهێنی، لە هەموو زیندانیانی سیاسی خوراگر و سەربەرزی كۆمەڵە، لەبنەماڵەی سەربەرزی شەهیدان و زیندانیانی سیاسی، لە چالاكانی مەدەنی، لە تێكۆشەرانی بوواری فەرهەنگی، لە هێزی كۆڵنەدەری پێشمەرگەی كۆمەڵە كە لەم دواییەدا جارێكی دیكە بوونە مایەی سەربەرزی حیزبەكەیان و هەموو كوردستانی رۆژهەڵات، لە هەموو تێكۆشەرانی دێرینی كۆمەڵە كە جێ‌پەنجەیان ئێستاش لە دەسكەوتە مێژوویی و بەهادارەكانی بزووتنەوەكەماندا دیارە، لە هەموو كەمئەندامانی ریزەكانی كۆمەڵە كە هێمای فیدكاریمانن، پیرۆزبایی و دەستخۆشی لە هەموو هەڵسووراوانی گشت بووارەكانی ئەم خەباتە پیرۆزە دەكەین.

بەڕێزان، ساڵی رابوردوو ساڵی رەنج و قوربانی و كارەساتی مرۆیی گەورە بۆ گەلی كورد و لەهەمان كاتدا ساڵی وەستانەوە و بەرگری و بەرەنگاری، ساڵی دەستەبەر كردنی دەسكەوتی گەورە بۆ بزووتنەوەی رزگاریخوازیی گەلی كورد بوو. لە میژووی ئەم نەتەوەیەدا ناوی كورد هەرگیز ئەوەندە لە سەرانسەری جیهان بەباشی دەنگی نەداوەتەوە و سۆز و پشتیوانی بۆ لای خۆی رانەكێشاوە، هەرگیز دنیا كوردستانی ئاوا وەك وەك مەكۆی ئازادی و بەها مرۆییە بەرزەكان لە زەلكاوی كۆنەپەرستی رۆژهەڵاتی ناوەراستدا نەسەلماندوە و هەرگیزیش ناوی پێشمەرگە وەكوو وشەیەكی ئاشنا و خۆشەویست ئاوا نەچۆتە قامووسی هەموو زمانەكانی جیهانەوە.

بێگومان كورد لەبەر دەم قۆناغێكی نوێ‌ و چارەنووسسازی خۆیدا وەستاوە و سەرەڕای ئەوەی كە هێشتا ئاستەنگ و دژواری لەبەر پێی كەم نین، بەڵام بە مەرجی راگرتنی یەكڕیزی و بەكار هێنانی ژیری سیاسی و درێژەدان بە خەباتی سەرسەختانە گەلی كورد دەتوانێ‌ هەنگاوی گەورە بەرەو دەستەبەر كردنی مافی دیاری كردنی چارەنووس هەڵگرێت.

ئێمەی كوردی رۆژهەڵات و بەتایبەت ئێمەی كۆمەڵە وەكوو هەمیشە خۆمان بەبەشێك لەو خەباتەی گەلی كورد لە هەموو پارچەكان دەزانین و پشتگیری و هاوكاری خۆمان بە وتە و بەكردەوە دەردەبڕین، بەبێ‌ ئەوەش كە دەست لە كاروباری هیچ پارچەیەكی كوردستان وەربدەین، ئیرادە و ویستیان پێشێل كەین و خۆمانیان بەسەردا بسەپێنین.

بەڵام كە باسی كوردستانی رۆژهەڵات، یانی مەیدانی سەرەكیی كار و خەباتی ئێمەمانانی كۆمەڵە، دێتە گۆڕێ‌، جێی خۆیەتی كە وەبیر هەمووانی بهێنێنەوە كە كورد لە ئێران لە خراپترین بارودۆخی ئابووری و سیاسی و فەرهەنگیدا بەسەر دەبات.

لەم رۆژانەدا یادی سی و شەش ساڵەی شۆڕشی گەلانی ئێران كە بەداخەوە و بەبێ‌ ویستی گەلی كورد بوو بە هۆی هاتنەسەر كاری رژیمی كۆماری ئیسلامی كرایەوە. ئەم سی و شەش ساڵە بەهەق لە رەشترین و نەهامەتبارترین سەردەمەكانی مێژووی ئێران هەژمار دەكرێت. رژیمێكی دیكتاتۆریی تۆتالیتەری داپڵۆسێنەر كە لەگەڵا هیچ تروسكاییەكی ئازادی و مافی مرۆڤ هەڵناكا، بەدی هێنەری ئابوورییەكی دارووخاوی داتەپێو، نوقم لە گەندەڵییەكی قووڵا و چارهەڵنەگر كە وەك شێرپەنجە ورد و درشتی وڵاتی تەنیوەتەوە، رژیمێك كە ئێرانی كردۆتە زیندانێكی گەوەری نەتەوە بندەستەكان، ژنان، لاوان، جیابیران، نووسەران و هونەرمەندان، كرێكاران و زەحمەتكێشانی ئەو وڵاتە دەوڵەمەندەی خستۆتە رووتی و رەجاڵییەكی بێ‌وێنە، ژینگەی ئێرانی بەرەو وێرانییەكی ترسناك و كاولكارانە بردووە، دەسپێكەر و دنەدەر و داڵدەدەرێ‌ تێروریزم لە رۆژهەڵاتی ناوەڕاست بووە و ئێستاش بەوتەی خۆی دەستی تێكدەری لە پایتەختی پێنج وڵاتی ئەم ناوچەیە كارگێر و پیلانگێڕن، رژیمێك كە بەتایبەتی لەئاست كورد و نەتەوە بندەستەكانی دیكەی ئێران پەیتا پەیتا ئیعدامی سیاسی تێكۆشەرانیان بەرێوە دەبا، بەڵێ‌، ئەم رژیمە كە قەیرانی ناوخۆیی بڕستی لێبڕیوە، لەبەر دەم هەڵبژاردنێكی چارەنووسسازی خۆیدایە و لە مانگەكانی داهاتوودا دەبێ‌ خۆی بەلایەكدا ساغ كاتەوە: یان وەكوو تا ئێستا بەپێچەوانەی یاسای نێونەتەوەیی و بڕیارەكانی ئەنجومەنی ئاسایش درێژە بە بەرنامە ئەتۆمییەكەی كە هیچ پاساوێكی ئابووری و ئاوەدانی و زانستی نییە و تەنیا بەمەبەستی خۆ زاڵا كردن بەسەر ناوچەكە و خۆ سەپاندن بەسەر دنیادا پێداگری لەسەر كردووە بدات و لەم حاڵەتەدا شەپۆلێكی گەورەی گرژی و گەمارۆی جیهانی بەهەموو ئاكامەكانی بەگژ خۆیدا بكا وە یان سەدان میلیارد دۆلاری تا ئێستا سووتاو و بەبادا دراوی بەرنامە ناوكییەكەی بكاتە قوربانی پیاسەیەكی دۆستانە لەگەڵا نوێنەرانی شەیتانی گەورە لە شەقامەكانی ڤیێنا و جامە ژهرێكی دیكە نۆش بكا كە ئەوەش بێگومان هەڵسانەوەی داخوازییە كۆمەڵایەتییە پەنگ خواردووە نێوخۆییەكان و قۆناغێكی نوێی بزووتنەوە كۆمەڵایەتییە داخوازیكارەكان بەدوای خۆیدا دێنێ‌. كۆماری ئیسلامیی ئێران بە هەر سێناریۆیەكدا تێپەر بێت، جۆرێك لە گۆڕان و شڵەقانی گۆمی مەندی ئیستیبداد بە شوێن خۆیدا دێنێت. ئێمەی كوردستانی رۆژهەڵات دەبێ‌ بەوردی و وریاییەوە بڕوانین و خۆمان بۆ هەر كام لەو ئەگەرانە ئامادە بكەین.

بەڵام لەكۆتاییدا، ئێوە دۆستان و هاوڕێیان و هاوخەباتانمان لە كوردستانی باكوور و رۆژاوا و باشووری كوردستان، كە ئێمەتان، ئێمەی كوردی رۆژهەڵاتتان لە هەموو خۆشی و ناخۆشییەكان، لەهەموو ئێش و ئازارەكان، لەهەموو دەستگرۆیی و هاوپشتییەكاندا، لەگەڵا خۆتان و لەسەنگەری پاڵا خۆتان دیوە، ئێرانمان لێ‌ مەكەن بە دۆست و هاوپەیمان. دۆست و هاوپەیمانی راستەقینەی ئێوە ئێمە بووین و ئێمەین. ئێش و ئازارەكانمان تێبگەن، رێز لە خەباتەكەمان، لە مێژوومان، لە ویست و ئیرادەی كۆمەڵانی خەڵكمان، لەسەروەریمان و لەسەربەخۆییمان بگرن و لە خەباتی ئەورۆ و داهاتووماندا هاوپشتیمان بكەن.

زۆر سپاس بۆ كاتەكەتان و رۆژێكی خۆشتان هەبێ‌.
هه‌ڵسه‌نگاندن

تا ئێستا بۆچونێک نه‌نوسراوه‌!
بۆچونێک بنوسه‌:

ناو (پیویسته‌)

ئیمه‌یڵ (پیویسته‌)

ماڵپه‌ڕ / وێبلاگ

سه‌ره‌تا | هه‌واڵه‌کان | به‌رنامه‌کان | دەربارەی ئێمە | پەیوەندی | فارسی

© هه‌موو مافێکی ئه‌م ماڵپه‌ڕه‌ پارێزراوه‌ (ڕۆژهه‌ڵات تی ڤی rojhelat.tv)

www.rojhelat.tvwww.rojhelat.tvwww.rojhelat.tv